Salih Muslim: Tiştekî me nemîne emê dar û belçiman bixwin

Hewlêr – Hevserokê Giştî yê PYD’ê diyar kir ku hevdîtinên wan ên bi Serokwezîrê Iraqê Nurî el Malikî û Wezirê Derve Hoşyar Zebarî re pêk anîne, baş derbas bûn. Muslim balê kişand ser rewşa gelê Rojava Kurdistanê û got “Pêdiviya gelê me bi aweyekî lezgîn bi alîkariyê heye, ji ber ku çiqa diçe rewşa mirovî ya Rojavayê Kurdistanê xerab dibe. Tiştekî me nemîne emê dar û belçiman bixwin û li ber xwe bidin.”

Salih Muslim bersiva pirsên nûçegihanê DIHA’yê Nihat Kaya da û diyar kir ku ew ji aliyê Serokkomarê Iraqê Celal Talabanî ve hatibûn vexwendin, lê belê ji ber nexweşiya Talabanî wan bi Malikî û Zebarî re hevdîtin pêk anîne. Muslim balê kişand ser van mijaran:

“Hikûmeta Bexda ne alîkariya rejîma Sûriye dike û ne jî destekê dide muxalefeta Sûriyeyê. Ew ji bo Sûriyeyê çareseriyekî siyasî dixwazin û dibêjin; eger rûxandina rejîm pêwist be, bila ev rejîm têkbiçe, lê belê bila welat xerab nebe. Rêveberiya Bexdayê dixwaze alîkariyê bide gelê Sûriyê. Mijara vekirina deriyê sînor bi taybetî nehate rojevê, lebelê ew dibêjin; çi ji destê me were emê bikin.

Ji bilî Desteya Bilind tu kes ne nûnerê Kurdan e. Eger em tevlî bibin jî, em ê wekî Desteya Bilind tevlî civîna dostên Sûriyeyê bibin ku tê gotin wê Kahireyê were li dar xistin. Eger milyonek û 200 sed hezar mirov derkevin û bêjin; ‘Desteya Bilind nûnerê min’ divê herkes ji vê re rêz bigre. Bila tukes nekeve nav deq û dolaban.

Rewşa gelê rojava bi rastî jî xerab e. Hîm zad û nanê wan li ber qedandinê ye û him jî mazot û benzîn nema ye. Jixwe cotkarî qet tûne, ji ber ku ev jî bi traktorên ku bi benzînê kar dikin tê kirin. Ji bakûr ve sînor hatiye girtin, nahêlin çi tişt derbas bibe. Li gorî agahiya me girtî, ji başûr 50 tankêr sûtemenî ji gelê Cizirê re hatiye şandin. Lêbelê çeteyên çekdar ji bo ku ev alîkarî negihêje Kurdan dest danîne 10 ji van tankêran, 40’ê dî jî birine Hamayê belav kirine.

Yanî li ser Kurdan ambargoyekî dijwar heye. Lê berxwedana me wê bidome. Tiştekî me nemîne emê dar û belçiman bixwin û li ber xwe bidin. Bila herkes baş bizanibe 50 milyon Kurd li pişt me ye. Di rewşekî wisa de bila kek Mesût jî bêdeng nemîne û alîkariya gelê me bike. Ewî gotibû ku ‘ezê alîkariya gel bikim’, fermo soza dayî bila pêk bîne. Gelê me û em li benda alîkariya wî ne.”