Pêşmergeyan gule li Rojavayiyên xwestin bimeşin sînor reşand

Dêrika Hemko – Gelê Rojavayê Kurdistanê yê ku xwest girtina deriyê sînor û embargoya li ser Rojavayê Kurdistanê bê rakirin, meşiya ser sînorê Başûrê Kurdistanê. Nêzî 150 kesên ku li gundên Durgurka û Kelhê Deham kom bûn ber bi sînor ve meşiyan, lê li rastî gulebarana Hêzên Pêşmerge yên girêdayî PDK’ê hatin. Di encamê de gundiyek birîndar bû. Hêjayê gotinê ye ku Serokatiya Herêma Kurdistanê dabû diyarkirin ku deriyê sînor nehatiye girtin.



Gelê gundên li ser sînorê Başûrê Kurdistanê xwestin helwesta girtina sînor û embargoya li ser Rojavayê Kurdistanê ya ji Hukûmeta Herêma Kurdistanê protesto bikin. Li gorî agahiyên ji çavkaniyên herêmî hatine girtin, bi sedan kesên ji gundên derdora Dêrika Hemko, saet di 13.30 de li gundê Kelhê Dehamê kom bûn û beşiyan sînor. Kurdistaniyan dan zanîn ku ew sînor nas nakin û xwestin derbas bibin. Lê li rastî astengiya pêşmergeyan hatin. Di encama gulebarana pêşmergeyan de gundiyê bi navê Îbrahîm Elî birîndar bû.



Ji ber ku deriyê sînor hatiye girtin, gelê Rojavayê Kurdistanê bi tengasiyên aboriyê re rû bi rû ye. Bi taybet ji ber hatina zivistanê, sotemenî li Rojavayê Kurdistanê peyda nabe.



Li hemberî nerazîbûna raya giştî û nûçeyên derbarê girtina sînorê Başûr û Rojavayê Kurdistanê de, Dîwana Serokatiya Herêma Kurdistanê daxuyaniyek belav kir û got: “Nûçe û nirxandinên ku di hinek rojnameyan de hatine belavkirin ku wekî ku sînorê di navbera Herêma Kurdistan û Kurdistana Sûriyeyê de hatiye girtin, rê nade hatûçûna gel û alîkariya mirovî hatiye qutkirin, ne rast in.”



Lê beriya niha gelek rayedarên Rojavayê Kurdistanê derbarê mijarê de daxuyanî dan û bang li Rêveberiya Başûrê Kurdistanê kirin ku deriyê sînor vebikin. Herî dawî, Endamê Desteya Bilind a Kurd (DBK) Ehmed Silêman, derbarê mijarê de ji ANF’ê re axivî û diyar kir ku wana ji Başûrê Kurdistanê xwetiye ku deriyê sînor vebikin, lê heta niha tu bersivek nedane vê banga wan. Silêman bal kişand ser pirsgirêkên jiyanî yên li Rojavayê Kurdistanê û destnîşan kir ku rewş pir xirab 



Her wiha, Serokê Herêma Kurdistanê Mesûd Barzanî roja 18’ê berfanbarê bi şandeya KCD’ê ya bi serokatiya Hevseroka Giştî ya KCD’ê hatibû Başûrê Kurdistanê, re hevdîtinek pêk anî. KCD’ê mijara sînor anî rojeva hevdîtinê. Barzanî jî diyar kir ku ji ber partiyên kurd di nava xwe de nabin yek û li hev nakin deriyê sînor venabe. Barzanî, anî ziman ku ger bê xwestin dikarin di navbera Çemê Dîcleyê û Gundê Qahirê yê Dihokê derî vekin.